التربية بالحب ……. بالمصري

مزاجك مكتئب والضغوط هدت حيلك وعشان كده مكشرة في وش عيالك وبتزعقي لهم؟؟!!طيب تعالي نشوف السبب؟
ايوا لانك بتشتغلي ساعات طويلة وبترجعي لمسؤولية البيت والعيال والتدريس والتنظيف وووو
طيب انت بتشتغلي ليه؟
حتقوليلي
عشان اخلي ولادي يعيشوا احسن عيشة ويتبسطوا ويخرجوا ويدخلوا احسن مدارس
طيب والضغوط جاية منين؟
هالكه نفسي في الشغل عشان خاطر يدرسوا بانترناشينول سكول
واموت نفسي بالبيت عشان خاطر يقعدوا ببيت نظيف وفرش جديد وهدوم ماركات ويبقو احسن ناس في الاخر بلاقيهم عناديين، مهملين ، مبوظين البيت ومافيش اي تعاون وكمان درجاتهم زفت!

مممم طيب متيجي نفكر شوية
هو انت مش قلت عايزة ولادك احسن ناس؟
طيب لو سألتك بالله عليك الي بتعمليه دا هو فعلا عشان ولادك؟ متجاوبيش بسرعة
استني فكري كويس… هو دا عشانهم فعلا؟
انا ماعتقدش انه عشانهم
يمكن يكون عشان ترضي نفسك انك احسن ام
او يشاوروا عليك الناس انك اعظم ام
الله دي عملت واشترت وجابت وحطت وكله عندها واو واو واو
مهو حتقوليلي لا انت بتظلميني انا بعمل كده عشانهم فعلا
طيب
ماشي
عشانهم
امال بتزعقيلهم ليه؟
مكشرة بوشههم ليه؟
بيحصلك احباط من ٩٢ في المية بالمعدل ليه؟
مهو بلاش نضحك ع نفسنا
خلينا صريحين شويه

?????????????

وفي الام التانية

قاعدة بالبيت وركنت الشهادة بدرج المطبخ
انت مابتشتغليش ليه؟
عشان ولادي
انا ماسيبش ولادي للحضانات والشغالات
ولا يمكن
طيب وبتعاني من الضغوط والاكتئاب ليه؟
اصلي زهقت وتعبت وحاسة اني ماعنديش وقت لنفسي واني بلا هدف ولا شخصية
الله
مش لسا قايلة دلوقت انك بتأدي رسالتك وامومتك؟
ايوة
بس ولادي تعبوني
وبزعق لهم
ومكشرة في وشهم
ومابقتيش طايقه اذاكر لهم
دول يجننوا اللي مايتجننش
وخصوصي اني بحس اني تخليت عن طموحي وتحقيق ذاتي وقعدت لهم وبرضوا مافيش فايدة
عشان كده تعبانة ومليش نفس حتى اسرح شعري
طيب
ممكن اسألك
هو انت تخليت عن وظيفتك وطموحك ليه؟
بالله عليك جاوبيني بصراحة
حتقولي عشان ولادي
طيب مهو انت معاهم اهو
يبقى تعبانة ليه؟
اصلي مابقتش اتحمل عنادهم وازعاجهم والفوضى
الله
هو مش انت لسا قايله بحبهم وهم كل همي في الحياة!!؟؟
ارجوك جاوبيني بصراحة قعدت في البيت ليه؟
خليك صادقه مع نفسك
مهو مش معقول بتعملي كل ده عشانهم ومشقادرة تبتسمي بوشههم ولا تحضنيهم؟؟

طيب
انا حقلكم على حاجة
ولادك والله مش حتفرق معاهم الكنب الايطالي
ولا السجاد العجمي
ولا هدوم Gap وغيروا
ولا الفسح والخروجات(الي نصها زعيق وزعل)
ولا احدث الاجهزة والالعاب
ولا حتى مدارس انترناشينول
ولا احسن ناني في الدنيا
ولادك عايزينك انت
بابتسامتك
وحضنك
وحبك
واخلاصك ليهم

وانت كمان الي في البيت
ولادك
مش همهم قعدتك في وشههم طول النهار
ولا اصناف الاكل والكيك الي بتعمليه وبتزعقي لهم طول الوقت لانهم ازعجوك وغلبوك وانت بتجهزيه
ولا اصدهم يحرموك شهادتك ولا طموحك
هي مش بالوقت الطويل الي بنقعدها معاهم
هي بالاهتمام الي بنديهولهم
وبالراحة والسعادة الي بنعيشها لاننا وسطهم
والحب الي بيطلع منا بس نشوفهم

حبيبتي الأم
مهما كانت ضغوطاتك
ظروفك
مشاكلك
لو انت فعلا همك اولادك
وعايزاهم ناجحين فعلا
حبيهم
شيلي التكشيرة
وسيبي شغل البيت
وخبي هدوم الماركات
وغطي الكنب الايطالي
وخليهم يعيشوا طفولتهم بحضنك وفرحتك بيهم وحبك
وصدقيني
حيخرجوا متفوقين
ورائعين ومبدعين
دا مش كلام ع ورق
دي حقيقة

الطفل بيحتاج
حب
اهتمام
تقدير
رعاية
وان شاء الله عمره مالبس ماركات
ولا حتى قميص مكوي وبنطلون مسطرة

بيكفيه
اكله سخنة معمولة بحب
وهدوم حالتها كويسة ريحتها حنانك ودفاك
ومدرسة تحترمه وتعلمه مهارات للحياة

لا فرنساوي ولا انجليش وهو حيبقى فل الفل
ومساءكم فل

تحياتي 
سناء عيسى

 

 

CLOSE
CLOSE