وراء كل سلوك سلبي مشاعر سلبيه

وراء كل سلوك سلبي مشاعر سلبيه اذا ساعدنا الطفل التخلص منها سنجني نتائج رائعة.
كتب لنا مشتركة من مشتركات الدورات الاعزاء وقالت:
“بعد ماشفت بوست زميلتي حبيت انا كمان شارك بتجربتي مع نوبة الغضب
ابني ياسر عمره 7سنوات رجع من مدرسته واضح عليه انو معصب ومو عطبيعته المهم كان هو واخته عم يلعبو سوا بغرفتهم فجاه بدأ الصراخ ،جاءت أخته سيما اشتكت منه انو ضربها وصرخ عليها ذهبت لعنده قلتله ماما شكلك معصب..فجاه صرخ في انا وقال لي اخرجي برة واتركيني لحالي،انا جمدت بارضي (خفت كتير) وماعرفت شو اتصرف،أعاقبه او ازعل منه انه يحكي معي بطريقه مو حلوه ولا شو اعمل،فقررت اعمل مراعاة المشاعر بدأت احكيله شكله في حدا معصبك كتييير،رجع قلي اتركيني لحالي واخرجي برة
انا قلتله رح اطلع وبس تهدا منحكي،بعد نص ساعه رجعت لعنده عالغرفه قلتله شو هديت؟؟؟رد صرخ عليي وهجم عاخته كان بده يضربها ،انا هون ماقدرت اتحمل بلشت أعصب وصرخت عليه،فجأه لقيته بلش يبكيييييي ويقلي انا اسف ماما لانو صرخت عليكي واسف سيما لانو ضربتك ويبكييييي ويبكييبي،انا هون رحت عانقته وياسر من النوع يلي مابحب حدا يعانقه كتير..بس هو يبكي ويعانقني وفجاه حكالي صحابي بالمدرسه ضحكوا عليي وانا هون عرفت سبب موجة الغضب الي صارت..وبوقتها عملت مراعاة المشاعر وحاولت خليه يلاقي حل لمشكلته وبالفعل قرر شو بدو يتصرف..وبعد ماخلصت المشكله وفرغ كل شي جواته من مشاعر سلبيه لقيته صار بني آدم تاني رجع يضحك ويلعب هو واخته من دون مشاكل وكانه هم وانزاح من على قلبو
وانا حمدت ربي يلي ما صرخت عليه اكتر من اللزوم او انه فلتت اعصابي اكتر لانو طلع بالفعل في مشكله وسبب ورا كللل هل السلبيه الي كان فيها”

انتهت قصة مشتركتنا. أتمنى أن نستفيد منها ونلاقي طريقة نتقرب من أولادنا ونفهم دواخلهم.

تحياتي 
سناء عيسى

CLOSE
CLOSE